భారత్‌లో కొత్త జీవి.. శత్రువులను చూసి అలారం మోగిస్తుంది!

భారత జీవవైవిధ్యంలో మరో అరుదైన జీవి వెలుగులోకి వచ్చింది. పశ్చిమ బెంగాల్‌లోని అడవుల్లో శాస్త్రవేత్తలు సరికొత్త జాతి చెదపురుగును కనుగొన్నారు. దీని ప్రత్యేకత ఏంటంటే.. శత్రువుల నుంచి రక్షించుకోవడానికి తన దవడలతో 'టిక్ టిక్' మని శబ్దం చేసి తోటివాటిని అప్రమత్తం చేస్తుంది. ఈ ప్రత్యేక లక్షణం కారణంగా ఇది శాస్త్రవేత్తల దృష్టిని ఆకర్షించింది.

ఈ కొత్త జాతి చెదపురుగుకు 'సూడోకాప్రిటెర్మస్ నోవస్' అని పేరు పెట్టారు. దీని సైనికుల దవడలు వంకరగా, అసమ నిర్మాణంతో ఉంటాయి. ప్రమాదం ఎదురైనప్పుడు ఈ దవడలను ఒకదానికొకటి వేగంగా కొట్టుకోవడం ద్వారా అలారం లాంటి శబ్దాన్ని సృష్టిస్తాయి. ఇది రక్షణకు లేదా తమ సమూహానికి సమాచారం ఇవ్వడానికి ఉపయోగపడుతుంది.

సాధారణంగా చెదపురుగులు అంటే ఇళ్లలోని ఫర్నిచర్‌ను, కలపను నాశనం చేసేవిగా మనకు తెలుసు. కానీ, ఈ కొత్తరకం చెదపురుగులు అందుకు పూర్తి భిన్నం. ఇవి మానవాళికి మేలు చేసేవి. నేలలో ఉండే కుళ్లిన ఆకులు, సేంద్రియ పదార్థాలను తిని జీవిస్తాయి. తద్వారా నేల సారాన్ని పెంచి, పర్యావరణ సమతుల్యతకు దోహదం చేస్తాయి. ఆరోగ్యకరమైన అటవీ ప్రాంతాలకు ఇవి సూచికగా నిలుస్తాయి.

పశ్చిమ బెంగాల్‌లోని చప్రామరి వన్యప్రాణుల అభయారణ్యంలో కూలిన సాల వృక్షం దుంగ కింద మట్టిలో వీటిని గుర్తించారు. జూలాజికల్ సర్వే ఆఫ్ ఇండియా, కలకత్తా యూనివర్సిటీ పరిశోధకులు కలిసి ఈ ఆవిష్కరణ చేశారు. మైక్రోస్కోపిక్ పరిశీలన, డీఎన్ఏ పరీక్షల ద్వారా ఇది కొత్త జాతి అని నిర్ధారించారు. భారత్‌లో ఈ ప్రజాతికి చెందిన చెదపురుగుల్లో ఇది ఐదవది. ఈ ఆవిష్కరణ మన దేశంలోని అభయారణ్యాల్లో ఇంకా కనుగొనని ఎన్నో జీవ జాతులు ఉన్నాయనడానికి నిదర్శనంగా నిలుస్తోంది.